OKMK professional futbol klubi Osiyo chempioni bilan shartnoma imzoladi. Qishki transfer oynasi doirasida olmaliqliklar O‘zbekiston yoshlar va olimpiya terma jamoalari a’zosi, 2023 yilgi U-20 Osiyo kubogi chempioni bo‘lgan 22 yoshli markaziy yarim himoyachi Behruz Asqarovni o‘z safiga qo‘shib olishdi.

Behruz Asqarov professional faoliyati davomida Toshkentning «Paxtakor» hamda Qozog‘istonning «Turon» klublari safida to‘p surib, turli chempionat va xalqaro musobaqalarda muhim tajriba to‘plagan. Markaziy yarim himoyachi sifatida u maydon markazida ishonchli va barqaror harakatlari, o‘yinni tashkil etishdagi faolligi, shuningdek, hujum va himoya o‘rtasidagi muvozanatni samarali ta’minlay olishi bilan ajralib turadi. Shu kunga qadar futbolchi klub miqyosida 55 ta uchrashuvda maydonga tushib, 2 ta gol hamda 3 ta golli uzatma muallifiga aylangan.

Shuningdek, futbolchi O‘zbekiston U-19 (6 ta o‘yin), U-20 (16 ta o‘yin) va U-23 (12 ta o‘yin) terma jamoalari safida munosib ishtirok etib, barqaror va ishonchli o‘yini bilan mutaxassislar hamda muxlislar e’tiborini qozongan. Behruz Asqarov 2023 yilda o‘tkazilgan U-20 Osiyo kubogida terma jamoamiz tarkibida chempionlikni qo‘lga kiritgan. Yangi mavsumdan boshlab olmaliqliklar sharafini himoya qiladigan iste’dodli futbolchi Behruz Asqarov bilan OKMK FK o‘rtasida bir yillik shartnoma imzolandi.