Аргентина терма жамоаси бош мураббийи Лионель Скалони ҳужумчи Лионель Мессининг 2026 йилги Жаҳон чемпионатида миллий жамоа сафида иштирок этиш эҳтимоли ҳақида фикр билдирди.

«Мен Месси билан учрашдим, Унинг уйига жуда яқин жойда яшайман. Жаҳон чемпионати масаласига келсак, буни кейинроқ кўрамиз. Биз кўп нарсалар ҳақида гаплашдик, аммо бу ҳақда эмас, чунки ҳали вақт бор. Уни ортиқча босим остида қолдириш керак эмас — у хотиржам бўлиб, қарор қабул қилиши керак. Кейин шу қарордан келиб чиқиб, жамоа учун нима яхшироқ эканини ўйлаб кўрамиз. Ҳозирча эса биз унинг Жаҳон чемпионатида ўйнайдими-йўқми, шу ҳақда гаплашмадик, бошқа мавзуларда суҳбатлашдик.

Уни танийдиганлар яхши билади: у ҳеч қачон бўшашмайди. У туғма жангчи — у ғалаба қозонишни хоҳлайди, ўйнашни хоҳлайди, у ҳар доим майдонда бўлишни истайди. Бу эса жуда муҳим, айниқса жамоадошлари учун. Улар сардорнинг ўзини қандай тутишига қараб, терма жамоага келиб ўйнашни исташади», — деди Скалони AFA Estudio YouTube-каналига берган интервьюсида.