"Кристал Пэлас" раҳбарияти "Сандерленд"дан учралган мағлубиятдан сўнг эмоционал фикрлар билдирган Оливер Гласнерни мавсум охиригача бош мураббий сифатида сақлаб қолмоқчи, деб хабар беради Sky Sports.
Аввалроқ, 51 ёшли мутахассис мавсум якунлангач, клубни тарк этишини маълум қилганди.
"Сандерленд"дан учралган мағлубиятдан (1:2) кейин австриялик мураббий таркибдаги муаммолар фонида "Пэлас" раҳбариятини очиқчасига танқид қилди: "Бизни ташлаб кетишганини ҳис қиляпман. Кўп футболчилардан фойдалана олмайман. Улар қўлларидан келганча ҳаракат қилишди ва буларнинг барчаси бир неча ҳафта ва ойлардан бери давом этмоқда. Бизда бор-йўғи 12 ёки 13 киши бор ва биз қўллаб-қувватлашни ҳис қилмаяпмиз."
Ҳозирда "Пэлас" Гласнерни истеъфога чиқармоқчи эмас ва мавсум якунлангач, хотиржам ва муносиб тарзда хайрлашишни маъқул кўради. Клубдагилар мураббий узоқ давом этган ғалабасиз серия фонида вазиятни барқарорлаштира олишига умид қилмоқда.
