Агар "Арсенал" жорий мавсумда барча учта кубок мусобақасининг финалига чиқса, жамоа 65 та ўйин ўтказишига тўғри келади. Бу жуда оғир синов, бироқ Микель Артета бунинг ечимини яхши билади.
Шимолий Лондон жамоаси устози Чемпионлар лигасида "Интер"га қарши ўйин олдидан юқори мақсадлар қўйилганда айёрликсиз илож йўқлигини таъкидлади:
"Биз футболчилар билан ишлашда айёрлик қиляпмиз! Навбатдаги ўйин — мавсумдаги энг муҳими, уч кундан кейин эса яна энг муҳими бўлади. Талаблар шундай, кутилмалар шундай, биз жамоа ва клуб сифатида белгилаб олган стандартлар ҳам шундай. Биз бу ҳаёт тарзини қувонч, иштиёқ ва катта энергия билан қабул қиламиз, вазият шуни талаб қилмоқда", — деди Артета.
