Аввал хабар берганимиздек, Ўзбекистон аёллар миллий терма жамоаси жорий йилнинг март ойида Австралияда бўлиб ўтадиган Осиё кубогида иштирок этади.
Бугун Ўзбекистон футбол ассоциацияси раҳбарияти аёллар миллий терма жамоаси аъзолари ҳамда мураббийлар штаби билан учрашув ўтказди. Учрашув давомида олдинда турган Осиё кубогига тайёргарлик жараёни, жамоанинг мусобақадаги вазифалари ва яратилаётган шароитлар муҳокама қилинди.
Учрашув якунида ассоциация раҳбарияти терма жамоани ҳар томонлама қўллаб-қувватлашни давом эттиришини таъкидлади. Жамоанинг мусобақага пухта тайёргарлик кўриши учун барча зарур шароитлар яратилаётгани ҳамда тайёргарлик жараёни доимий назоратда бўлиши қайд этилди.
Шунингдек, аёллар миллий терма жамоаси олдига қўйилган асосий мақсадлар белгилаб олиниб, футболчиларга Осиё кубогида мамлакатимиз шаънини муносиб ҳимоя этиш борасида омад ва муваффақиятлар тиланди.
Эслатиб ўтамиз, терма жамоа 3 февраль куни навбатдаги йиғинни ўтказиш учун Туркияга жўнаб кетади.













