"Манчестер Сити" шу ёзда Хосеп Гвардиоланинг эҳтимолий кетишига тайёргарлик кўриб, янги бош мураббий изламоқда. Журналист Кристиан Фалькнинг берган маълумотларига кўра, "шаҳарликлар"нинг қисқа рўйхатидан "Бавария" устози Венсан Компани жой олган.
Бироқ бельгиялик мутахассис ҳатто "Манчестер Сити" учун ҳам Мюнхен клубини тарк этиш ниятида эмас. Компанининг "Бавария" билан шартномаси 2029 йил 30 июнга қадар амал қилади ва у жамоанинг келажакдаги лойиҳасига қаттиқ ишонади.
Эслатиб ўтамиз, Венсан Компани 2008 йилдан 2019 йилгача "Манчестер Сити"да тўп сурган ва клуб сардори бўлган. "Шаҳарликлар" таркибида бельгиялик ҳимоячи 12 та совринни қўлга киритган, улардан тўрттаси АПЛ чемпионлик унвонидир. Компани 2024 йилдан буён "Бавария"ни бошқариб келмоқда.













