Мадриднинг «Реал» клубига тегишли бўлган ҳужумчи Эндрик «Лион» сафида узоқ қолмайди.

19 ёшли футболчи Францияда ўзини жуда ёрқин кўрсатмоқда: у «тўқувчилар» сафида ўтказган бешта ўйинида бешта гол ва битта голли узатмани ўз ҳисобига ёздириб қўйди. Diario AS нашрининг хабарига кўра, «Реал» раҳбарияти бразилиялик футболчининг ёзда, мавсум якунланиши биланоқ қайтарилиши борасида бир қарорга келган. «Қаймоқранглилар» ижара муддатини узайтиришга рози бўлишмайди, шунингдек, бошқа клублардан келадиган трансфер таклифлари ҳам кўриб чиқилмайди.

Эндрик «Лион» сафига январь ойи бошида келиб қўшилган эди. Франция Кубогининг 1/8 финали доирасида «Лавал»га (2:0) қарши кечган яқиндаги баҳсда ёш ҳужумчи 80-дақиқада гол киритишга муваффақ бўлди.