«Аталанта» Италия Кубоги чорак финалида Туриннинг «Ювентус» жамоаси дарвозасига жавобсиз учта гол йўллаб, ишончли тарзда ярим финалга йўл олди. Учрашувдаги сўнгги голга муаллифлик қилган хорватиялик футболчи Марио Пашаличнинг фикрича, унинг жамоаси баҳс давомида тўлиқ устунлик қилган.
«Менга берилган ўйин вақтидан максимал даражада самарали фойдаланишга ҳаракат қиляпман. Ўйин давомида ҳимояланишга ва бир оз сабр қилишга тўғри келган вазиятлар ҳам бўлди, аммо умуман олганда, биз доминантлик қилдик ва ярим финал йўлланмасига муносиб эдик», — дея футболчининг сўзларини келтиради calcioatalanta.it.
Эслатиб ўтамиз, «Аталанта» ўз тарихида Италия Кубогида фақат бир марта — 1963 йилда ғолиб чиққан.
