Миланнинг «Интер» клуби марказий ҳимоячиси Янн-Аурель Биссекк Мюнхеннинг «Бавария» клуби қизиқишлари доирасига тушди. Бу ҳақда SPORT1 нашри хабар бермоқда.
Манбанинг таъкидлашича, «Бавария» 25 ёшли ҳимоячини кузатиб бормоқда, бироқ ҳозирча футболчи билан тўғридан-тўғри алоқага чиқилмаган. Германия гранди Дайо Упамекано жамоада қолганига қарамай, марказий ҳимоячилар бозорини ўрганишда давом этмоқда.
Январь ойида «Интер» Биссеккни Англия Премьер-лигаси клубларидан бирига сотишдан бош тортган эди, эндиликда «нерадзурри» ўз футболчиси билан шартномани узайтириш бўйича музокаралар олиб бормоқда.
Жорий мавсумда Биссекк барча турнирларни ҳисобга олган ҳолда 21 та ўйинда майдонга тушиб, битта гол урди ва иккита голли узатмани амалга оширди.
