Мадриднинг «Реал» клуби ўнг қанот ҳимоячиси Давид Хименес асосий жамоадан муқим жой олиши мумкин.
21 ёшли футболчи Ла Лига доирасидаги «Валенсия»га қарши кечган сўнгги учрашувда (2:0) илк бор асосий таркибда майдонга тушди. Журналист Рубен Мартиннинг хабарига кўра, жамоа устози Альваро Арбелоа Хименеснинг «Месталья»даги ўйинидан жуда мамнун бўлган. Мураббий латералнинг имкониятлари ва салоҳиятини «Кастилья»даги биргаликдаги фаолияти орқали жуда яхши билади, шунга қарамай, футболчи барча кутилмалардан аълороқ натижа кўрсатишга муваффақ бўлди. Кўринишидан, эндиликда ёш испаниялик асосий таркиб ўйинларига тез-тез жалб этилади.
Давид Хименес «Реал» сафида жами тўртта учрашувда қатнашди, уларнинг иккитаси Испания Кубогига тўғри келади. Март ойида футболчи 22 ёшни қарши олади.
