«Ноттингем Форест» хўжайини Евангелос Маринакис натижа кутишни ёқтирмайдиган кўринади. 2025/2026 йилги мавсум давомида «ўрмончилар» аллақачон учта мураббийни ишдан бўшатиб улгуришди.

Яқинда Шон Дайчнинг истеъфоси ҳақида хабар берилган эди. У 21 октябрдан бери жамоани бошқариб, 25 та ўйинда иштирок этди (10 ғалаба, 5 дуранг, 10 мағлубият).

Октябрь ойида «Ноттингем Форест» саккизта ўйиндан сўнг (икки дуранг, олти мағлубият) Анге Постекоглу билан хайрлашган эди. Сентябрь ойида эса Нуну Эшпириту Санту Маринакис билан муносабатлари ёмонлашгани сабабли ўз лавозимини тарк этганди — португалиялик мутахассис таркибни кучайтиришни талаб қилган.

Ҳозирда «Ноттингем Форест» АПЛ турнир жадвалида 17-ўринни эгаллаб турибди ва хавфли ҳудуддан атиги уч очко олдинда.