«Ливерпуль» ярим ҳимоячиси Ватару Эндо АПЛнинг 26-тури доирасида «Сандерленд»га қарши ўйинда (1:0) жиддий жароҳат олди.

62-дақиқада япониялик футболчи қанотдан узатилган тўпни қайтариш жараёнида оёғини нотўғри босиб олди ва тўпиғидан жароҳатланди. Шунга қарамай, Эндо ирода кўрсатиб, бир муддат ўйинни давом эттирди ва ҳатто ўз жамоасига бурчак тўпини қайтаришда ёрдам берди. Бироқ оғриқ кучайиб кетгани сабабли у майдонга ётишга мажбур бўлди.

Вазиятнинг жиддийлиги шундаки, тиббий ёрдам кўрсатилаётган вақтда Эндога кислород ниқоби берилди ва у майдонни кўз ёшлари билан, замбилда тарк этди.

Жамоа бош мураббийи Арне Слот ўйиндан кейинги матбуот анжуманида қуйидагича фикр билдирди:

"Бу жуда жиддий жароҳат. Ҳозирча аниқ ташхисни билмаймиз, лекин аҳвол яхши эмас. Менимча, у узоқ муддатга сафдан чиқди. Бу мавсумда ўнг қанот ҳимояси биз учун ҳақиқий лаънатга айланди".

Эслатиб ўтамиз, Эндо ушбу ўйинда жароҳат олган Конор Брэдли ва Жереми Фримпонгларнинг йўқлиги сабабли ноодатий — ўнг қанот ҳимоячиси позициясида ҳаракат қилаётган эди. Ушбу жароҳат нафақат унинг «Ливерпуль»даги мавсумини, балки ёзда бўлиб ўтадиган ЖЧ-2026даги иштирокини ҳам сўроқ остида қолдирмоқда.