«Liverpul» yarim himoyachisi Vataru Endo APLning 26-turi doirasida «Sanderlend»ga qarshi o‘yinda (1:0) jiddiy jarohat oldi.

62-daqiqada yaponiyalik futbolchi qanotdan uzatilgan to‘pni qaytarish jarayonida oyog‘ini noto‘g‘ri bosib oldi va to‘pig‘idan jarohatlandi. Shunga qaramay, Endo iroda ko‘rsatib, bir muddat o‘yinni davom ettirdi va hatto o‘z jamoasiga burchak to‘pini qaytarishda yordam berdi. Biroq og‘riq kuchayib ketgani sababli u maydonga yotishga majbur bo‘ldi.

Vaziyatning jiddiyligi shundaki, tibbiy yordam ko‘rsatilayotgan vaqtda Endoga kislorod niqobi berildi va u maydonni ko‘z yoshlari bilan, zambilda tark etdi.

Jamoa bosh murabbiyi Arne Slot o‘yindan keyingi matbuot anjumanida quyidagicha fikr bildirdi:

"Bu juda jiddiy jarohat. Hozircha aniq tashxisni bilmaymiz, lekin ahvol yaxshi emas. Menimcha, u uzoq muddatga safdan chiqdi. Bu mavsumda o‘ng qanot himoyasi biz uchun haqiqiy la’natga aylandi".

Eslatib o‘tamiz, Endo ushbu o‘yinda jarohat olgan Konor Bredli va Jeremi Frimponglarning yo‘qligi sababli noodatiy — o‘ng qanot himoyachisi pozisiyasida harakat qilayotgan edi. Ushbu jarohat nafaqat uning «Liverpul»dagi mavsumini, balki yozda bo‘lib o‘tadigan JCH-2026dagi ishtirokini ham so‘roq ostida qoldirmoqda.