«Ал-Ҳилол» ҳужумчиси Дарвин Нуньес Карим Бензема жамоага келиб қўшилганидан сўнг Саудия Арабистони чемпионати ўйинларида иштирок эта олмайдиган бўлди.

Инсайдер Фабрицио Романонинг хабарига кўра, Ар-Риёд клуби 32 ёшли ҳимоячи Пабло Мари ва ёзда «Ливерпуль»дан бонуслар билан бирга 65 миллион еврога сотиб олинган 26 ёшли уругвайлик футболчини мавсум учун қайдномадан чиқариб ташлаган.

Шу тариқа, Саудия Про-лигасининг 16 та ўйинида 6 та гол уриб, 4 та голли узатмани амалга оширган Нуньес эндиликда ички чемпионат баҳсларида майдонга туша олмайди. У фақатгина Осиё Чемпионлар Лигаси ўйинларида иштирок этиши мумкин.

Эслатиб ўтамиз, «Ал-Ҳилол» февраль ойи бошида 38 ёшли Карим Бенземани «Ал-Иттиҳод» жамоасидан ўз сафига қўшиб олган эди. «Реал Мадрид»нинг собиқ ҳужумчиси янги жамоасидаги дебют ўйинидаёқ хет-трик қайд этди ва Малкомнинг голига ассистентлик қилди.

Маълумот учун, Саудия Арабистони клубларига 10 нафаргача чет эллик футболчини рўйхатдан ўтказишга рухсат берилган, бироқ уларнинг фақат 8 нафари бир вақтнинг ўзида майдонда ҳаракат қилиши мумкин.