«Al-Hilol» hujumchisi Darvin Nunyes Karim Benzema jamoaga kelib qo‘shilganidan so‘ng Saudiya Arabistoni chempionati o‘yinlarida ishtirok eta olmaydigan bo‘ldi.
Insayder Fabrisio Romanoning xabariga ko‘ra, Ar-Riyod klubi 32 yoshli himoyachi Pablo Mari va yozda «Liverpul»dan bonuslar bilan birga 65 million yevroga sotib olingan 26 yoshli urugvaylik futbolchini mavsum uchun qaydnomadan chiqarib tashlagan.
Shu tariqa, Saudiya Pro-ligasining 16 ta o‘yinida 6 ta gol urib, 4 ta golli uzatmani amalga oshirgan Nunyes endilikda ichki chempionat bahslarida maydonga tusha olmaydi. U faqatgina Osiyo Chempionlar Ligasi o‘yinlarida ishtirok etishi mumkin.
Eslatib o‘tamiz, «Al-Hilol» fevral oyi boshida 38 yoshli Karim Benzemani «Al-Ittihod» jamoasidan o‘z safiga qo‘shib olgan edi. «Real Madrid»ning sobiq hujumchisi yangi jamoasidagi debyut o‘yinidayoq xet-trik qayd etdi va Malkomning goliga assistentlik qildi.
Ma’lumot uchun, Saudiya Arabistoni klublariga 10 nafargacha chet ellik futbolchini ro‘yxatdan o‘tkazishga ruxsat berilgan, biroq ularning faqat 8 nafari bir vaqtning o‘zida maydonda harakat qilishi mumkin.
