Мадриднинг "Реал" клуби бош мураббийи Альваро Арбелоа Чемпионлар Лигаси олдидан ярим ҳимоячи Федерико Вальвердени сақлашни режалаштирмоқда.

Бугун "қаймоқранглилар" Ла Лига баҳси доирасида ўз майдонларида "Реал Сосьедад"ни қабул қилишади. "Marca" нашри берган маълумотларга кўра, мадридликлар устози Вальвердега дам бериш ниятида. Бундан кўзланган мақсад — футболчининг сешанба куни Лиссабонда "Бенфика"га қарши бўлиб ўтадиган Чемпионлар Лигаси ўтиш босқичининг илк ўйини олдидан куч тўплашини таъминлашдир.

Бугунги учрашувда майдон марказидаги учликни Эдуардо Камавинга, Орельен Тчуамени ва Арда Гюлер ташкил этиши кутилмоқда. Ўйин Тошкент вақти билан тунги соат 01:00 да бошланади.