"Челси" вингери Эстевао Виллиан Англия Кубоги доирасида "Халл Сити"га қарши кечган ўйинда гол уришга муваффақ бўлди.
18 ёшли футболчи 59-дақиқада рақиб дарвозасини ишғол қилиб, ҳисобни 3:0 кўринишига келтирди. Бу бразилиялик футболчининг жорий мавсумдаги еттинчи голи бўлди: "Opta" хабарига кўра, бу Премьер-лига ташкил этилган пайтдан буён 19 ёшдан ошмаган футболчилар ўртасидаги клуб рекорди ҳисобланади.
Эстевао Виллиан ўтган йилнинг ёзида Бразилиянинг "Палмейрас" клубидан "Челси"га ўтган эди. Ёш юлдузнинг ҳисобида нафақат еттита аниқ зарба, балки учта голли узатма ҳам бор. Бундай кўрсаткичларга эришиш учун вундеркинд "кўклар" сафида барча турнирларда 32 та ўйинда майдонга тушди.













