Мадриднинг "Реал" клуби бош мураббийи Альваро Арбелоа Ла Лига доирасида "Реал Сосьедад" устидан қозонилган йирик ғалабадан (4:1) кейин ўз таассуротлари билан ўртоқлашди.
"Қаймоқранглилар" Гонсало Гарсия, Винисиус Жуниор (дубль) ва Федерико Вальверденинг голлари эвазига уч очкони қўлга киритишди. Меҳмонлар сафида Микель Оярсабаль битта аниқ зарба билан жавоб қайтарди.
"Ажойиб ғалаба. "Реал Сосьедад" биз билан учрашувга қадар 12 ўйинлик мағлубиятсиз серияга эга эди, аммо биз машғулотларда жуда яхши тайёргарлик кўрдик ва барча ғояларимизни майдонга кўчира олдик", — дея "Madrid Universal" Арбелоанинг сўзларини келтирмоқда.
Мадридликлар "Барселона"дан икки очкога ўзиб кетиб, яна турнир жадвалида пешқадам бўлиб олишди, бироқ каталонияликларда битта захира ўйини мавжуд.
