«Ливерпуль»да тез орада бош мураббий ўзгариши мумкин. Мерсисайдликларнинг жорий Премьер-лига мавсумидаги муваффақиятсиз натижалари сабабли Арне Слотнинг келажаги сўроқ остида қолмоқда.
Журналист Николо Скиранинг хабар беришича, агар жамоа Чемпионлар лигасига йўлланма ололмаса ва жорий мавсум якунларига кўра бирорта ҳам соврин қўлга киритмаса, «қизиллар» раҳбарияти катта эҳтимол билан нидерландиялик мутахассисни истеъфога чиқаради.
Слотнинг ўрнини эгаллаши мумкин бўлган энг асосий номзод сифатида Хаби Алонсо кўрилмоқда. Илгари «Ливерпуль»да тўп сурган испаниялик мутахассис шу йилнинг январь ойи ўрталарида Мадриднинг «Реал» клубидан истеъфога чиқарилган эди.
Ҳозирги вақтда «қизиллар» Англия чемпионати турнир жадвалида олтинчи поғонани эгаллаб туришибди.
