Лондоннинг «Арсенал» клуби бош мураббийи Микель Артета жамоадаги жароҳатлар мавзусида фикр билдирди.

Якшанба куни «канонирлар» Англия Кубогининг тўртинчи босқичида «Уиган» устидан йирик ғалабага эришишди (4:0). Учрашув якунлангач, журналистлар испаниялик мутахассисдан жароҳатлар билан боғлиқ вазиятдан хавотирдами ёки йўқлигини сўрашди.

«Ҳа, чунки биз қийин даврни бошдан кечиряпмиз. Аввалига ҳужумчилар сафдан чиқишди, кейин — ҳимоячилар, энди эса ярим ҳимоячилар билан боғлиқ муаммолар бошланди. Биз ҳали ҳам вазиятни назорат қиляпмиз, лекин бизга соғлом ва тайёр ўйинчилар керак», — деди Артета TNT Sports нашрига берган интервьюсида.

Чоршанба куни «Арсенал» Премьер-лига доирасида сафарда «Вулверхэмптон»га қарши баҳс олиб боради.