"Ливерпуль" яримҳимоячиси Стюарт Даунинг расман "Вест Хэм" ўйинчисига айланди. Бу ҳақда ҳаридор томон расмий сайти шундай ёзади.
29 ёшли яримҳимоячи билан 4 йиллик шартнома имзоланган. Трансфер суммаси ҳозирча маълум қилинмаяпти.
"Вест Хэм"га ўтганимдан жуда хурсандман. Бу мен учун жуда катта имконият. Бундай буюк жамоа сафида майдонга тушишни сабрсизлик билан кутяпман. Ҳозир формадаман ва мавсум стартидаги "Кардифф Сити" билан ўйинга тайёрман. Янги мавсум тайёргарлиги доирасида "Ливерпуль" сафида бир нечта ўйинларда майдонга тушдим, шундай экан бу борада муаммо йўқ.
Ҳаммаси жуда тез бўлиб кетди, лекин мен бундан хурсандман ва шанба куниёқ майдонга тушишга умид қиляпман", деди Даунинг.
Аввалроқ томонлар трансфер борасида келишувга эришганликлари хабар қилинганида, "Вест Хэм" 6 миллион фунт тўлаётгани ҳақида ёзилганди.
Эслатиб ўтамиз, ушбу яримҳимоячи "Ливерпуль"га 2011 йили "Астон Вилла"дан 18 миллион фунт эвазига ўтганди. Ҳозиргача мерсисайдликлар сафида 91та ўйин ўтказишга улгурган Стюарт Даунингнинг ҳисобида 7та гол бор.
