Европалик футбол ишқибозлари 2026-йилги Жаҳон чемпионати арафасида АҚШдаги иммиграция сиёсати ва полиция рейдлари туфайли жиддий хавотир билдирмоқда.
Мухлисларнинг хавотири фонида Еврокомиссиянинг маданият, спорт ва ёшлар масалалари бўйича комиссари Гленн Микаллеф ФИФА президенти Жанни Инфантинога мурожаат қилди. Микаллеф халқаро футбол ташкилоти раҳбарини АҚШдаги ташкилотчилар билан мулоқотда бўлишга ва европалик мухлислар хавфсизлигини кафолатлашга чақирди.
“Мен Инфантинони ташкилотчилар билан гаплашганда мухлислар хавфсизлигини ҳисобга олишга ундадим. АҚШга борадиган ҳар бир инсоннинг хавфсизлигини таъминлаш учун ФИФА ва мезбонлар билан доимий мулоқотда бўлишимиз зарур”, дейди Гленн Микаллеф.
Ўз навбатида, АҚШ Давлат департаменти вакили мусобақа хавфсизлиги, спортчилар ва мухлислар ҳимояси мезбон томон учун энг устувор вазифа эканини таъкидлади. Турнир давомида тартибни сақлашга АҚШ Иммиграция ва божхона назорати хизмати ходимлари ҳам жалб қилиниши кутилмоқда.
Эслатиб ўтамиз, 2026-йилги Жаҳон чемпионати 11-июндан 19-июльга қадар АҚШ, Канада ва Мексика майдонларида бўлиб ўтади. Илк бор 48 та терма жамоа иштирок этадиган турнирнинг асосий ўйинларига АҚШ мезбонлик қилади.
