«Манчестер Сити» бош мураббийи Хосеп Гвардиола Винисиус Жуниор билан боғлиқ можародан сўнг футболдаги ирқчилик муаммоси ҳақида гапирди. «Реал» футболчиси «Бенфика» аъзоси Жанлука Престианнини ирқий ҳақоратларда айблаган, УЕФА эса ушбу ҳолат бўйича тергов бошлаган эди.
«Яқинда ҳам айтгандим: туғилган жойимиз ёки теримизнинг ранги бизни яхшироқ ёки ёмонроқ қилмайди. Бу нафақат футболнинг, балки бутун жамиятнинг муаммоси. Ҳали қилинадиган ишлар кўп. Ирқчилик фақат тери рангида акс этмайди. У ўзингизни турли сабабларга кўра бошқалардан устун ёки пастроқ деб ҳисоблаганингизда ҳам намоён бўлади.
Вазиятни қандай яхшилаш мумкин? Мактаблар орқали. Ўқитувчиларга сармоя киритиш керак. Бу иллатга мана шундай курашилади — футболда эмас, мактабларда. Жамиятдаги энг муҳим инсонлар мураббийлар эмас, ўқитувчилар ва шифокорлар бўлиши керак», — деди Гвардиола матбуот анжуманида.
«Манчестер Сити» шанба куни Премьер-лига доирасида «Ньюкасл»га қарши баҳс олиб боради.
