«Кристал Пэлас» клуби бош мураббий Оливер Гласнерни истеъфога чиқариш ниятида эмас. Аввалроқ, жамоанинг сўнгги 15 та учрашувда бор-йўғи битта ғалаба қайд этгани фонида, клуб раҳбарияти мутахассисни лавозимидан озод этиш имкониятларини кўриб чиқаётгани ҳақида хабар берилган эди.
Инсайдер Фабрицио Романонинг маълумотларига кўра, бугун бўлиб ўтган музокаралардан сўнг «Пэлас» раҳбарияти Гласнер билан ҳамкорликни жорий мавсум якунига қадар давом эттириш ниятида эканлигини маълум қилган. Шу билан бирга, мураббийнинг муддатидан аввал кетиши ҳам истисно этилмайди — барчаси юзага келадиган вазият ва қайд этиладиган натижаларга боғлиқ бўлади.
Таъкидлаш жоизки, шу йилнинг январь ойидаёқ Гласнернинг мавсум якунлангач клубни тарк этиши маълум бўлган эди.
