Англия чемпионатининг 27-туридан ўрин олган сафар ўйинида «Ливерпуль» «Ноттингем Форест»ни 1:0 ҳисобида минимал фарқ билан мағлуб этди. Учрашув якунида аргентиналик ярим ҳимоячи Алексис Мак Аллистер ягона гол муаллифига айланди.

Мерсисайдликларнинг собиқ ҳимоячиси Жейми Каррагер финал ҳуштагидан сўнг жамоанинг юлдузли ҳужумчиларини танқид қилди.

«Бу мен ушбу мавсумда АПЛда кўрган энг катта «ўғирлик»лардан (кутилмаган ғалабалардан) бири бўлди. Нгумоа захирадан майдонга тушиб, 15 дақиқа ичида Салоҳ ва Гакпонинг бутун ўйин давомидаги ҳаракатларидан кўра фойдалироқ ўйнади. У учрашув тақдирини ўзгартириб юборди. Бу йигит илк дақиқалардан майдонга тушиши керак. Рио ҳозир жуда яхши ҳолатда», — дея экспертнинг сўзларини келтирмоқда Sky Sports.

Арне Слот шогирдлари 45 очко жамғарган ҳолда АПЛ турнир жадвалида олтинчи ўринда боришмоқда.