Спорт турлари бўйича терма жамоаларимиз, хусусан, клублар фаолиятини молиялаштириш масалаларига бағишланган учрашув бўлиб ўтди. Иқтисодиёт ва молия ҳамда Спорт вазирликлари, Миллий Олимпия қўмитаси ва Ўзбекистон футбол ассоциацияси мутасаддилари иштирок этган йиғилишда кун тартибига киритилган масалалар атрофлича муҳокама қилинди.
Учрашув давомида спорт соҳасига хусусий секторни кенг жалб этиш, бу борада ташаббус кўрсатган тадбиркорлар учун қўшимча имтиёз ва рағбатлантириш механизмларини жорий этиш орқали янгича молиялаштириш тизимини шакллантириш бўйича устувор вазифалар муҳокама қилинди. Расмийлар бундай ёндашув замонавий менежмент тамойилларини жорий этиш, клублар фаолияти самарадорлигини оширишга хизмат қилишини таъкидладилар.













