Англия футбол мутасаддилари АПЛ 24-туридан ўрин олган «Челси» — «Вест Хэм» (3:2) учрашувидаги инцидент бўйича ўз ҳукмини чиқарди. Ўйин «аристократлар»нинг ғалабаси билан якунланган эди.

Асосий вақтга қўшиб берилган дақиқаларда футболчилар ўртасида оммавий тартибсизлик (муштлашув) юзага келган. Эшитувлар давомида ҳар икки клуб ўз айбини тан олди. Англия Футбол ассоциацияси (ФА) «Челси»ни 325 000 фунт, «Вест Хэм»ни эса 300 000 фунт миқдорида жаримага тортди. Ушбу қарор ташкилотнинг расмий сайтида эълон қилинди.

АПЛнинг жорий мавсумида «Челси» 45 очко билан бешинчи ўринни эгаллаб турибди. «Вест Хэм» эса 25 очко билан хавфли ҳудудда — 18-поғонада бормоқда.