Ўзбекистон миллий терма жамоасининг ЖЧ—2026 гуруҳ босқичидаги рақиби ўзгариши кутилмоқда. The Guardian Nigeria News нашрининг хабар беришича, Нигерия футбол федерацияси (НФФ) плей-офф баҳсида мағлуб бўлганига қарамай, Конго ДР устидан FIFA’га шикоят киритган.

Нигерия томони конголиклар таркибида майдонга тушиш ҳуқуқига эга бўлмаган бир неча футболчи ўйнаганини иддао қилмоқда. Конго терма жамоасининг айрим футболчилари Европа (масалан, Бельгия ёки Франция) паспортига эга. Мамлакат қонунларига кўра, улар Европа паспортини олган заҳоти автоматик равишда Конго фуқаролигини йўқотган ҳисобланади. Нигерия бу ҳолатни қонунбузарлик деб ҳисоблаб, рақибини дисквалификация қилишни ҳамда қитъалараро плей-офф йўлланмасини ўзига қайтаришни талаб қилмоқда.

Ушбу ҳолат Фабио Каннаваро бошқарувидаги Ўзбекистон терма жамоасининг мундиалдаги ўйинларига ҳам бевосита таъсир ўтказади. Сабаби, қитъалараро плей-офф (Ямайка, Янги Каледония ва Конго ДР ёки Нигерия) ғолиби айнан Ўзбекистон ўрин олган “K” гуруҳидан жой олади. Агар FIFA Нигерия талабини қаноатлантирса, қитъалараро ўтиш ўйинида Конго ўрнига Нигерия йўл олади. Ҳозирча мазкур иш FIFA тартиб-интизом қўмитаси томонидан кўриб чиқилмоқда. Якуний қарор яқин кунларда эълон қилиниши мумкин.

Маълумот учун, Ўзбекистон терма жамоаси “K” гуруҳида Португалия, Колумбия ҳамда қитъалараро плей-офф ғолибига қарши майдонга тушади. Каннаваро жамоаси мундиалдаги илк ўйинини 17 июнь куни Мехико шаҳрида Колумбияга қарши ўтказади.