Мадриднинг «Реал» клуби ярим ҳимоячиси Орельен Тчуамени жамоанинг Чемпионлар лигаси 1/8 финалидаги эҳтимолий рақиблари ҳақида гапирди.

Чоршанба куни Альваро Арбелоа шогирдлари ўз майдонида «Бенфика»ни мағлуб этди (2:1) ва икки ўйин натижасига кўра 3:1 ҳисобида устун келиб, плей-офф босқичидан муваффақиятли ўтди. 1/8 финалда «қаймоқранглилар» ё «Манчестер Сити», ёки Лиссабоннинг «Спортинг» жамоасига қарши майдонга тушади. Қуръа ташлаш маросими жума куни бўлиб ўтади.

«Манчестер Сити»? Биз бу ҳақда ўйлаётганимиз йўқ, чунки бор эътиборимизни ўз ўйинимизга қаратганмиз. Ким билан ўйнашимиздан қатъи назар, биз шунчаки майдонга тушамиз ва ўйнаймиз», — деди УЕФАга берган интервьюсида «Бенфика» дарвозасига гол урган ва учрашувнинг энг яхши футболчиси деб топилган Тчуамени.

1/8 финал учрашувлари 10-11 ва 17-18 март кунлари бўлиб ўтади.