Неймар "Васко да Гама"га қарши ўйинда дубль қайд этди. Юлдуз ҳужумчи гол нишонлашини Винисиусга бағишлади — у бурчак байроқчаси олдида худди "Реал" ўйинчиси яқинда Чемпионлар лигасида "Бенфика"га қарши ўйинда қилганидек рақсга тушди. Ўшанда баъзилар Винисиуснинг бу ҳаракатини провокация деб атаб, танқид қилишган эди.
Неймар ижтимоий тармоқларда ўз рақси акс этган суратни жойлаштирди. Винисиус эса унга изоҳ қолдирди.
"Мен сени яхши кўраман", — деб ёзди Винисиус.
"Реал" навбатдаги ўйинини душанба куни, 2 март куни ўтказади. Альваро Арбелоа жамоаси Испания чемпионати доирасида ўз майдонида "Хетафе"га қарши баҳс олиб боради.
