Германия терма жамоаси бош мураббийи Юлиан Нагельсманн "Бавария" ярим ҳимоячиси Леон Горецкага ишонишда давом этмоқда.
Гарчи хавбек жорий мавсум якунланганидан кейин Мюнхен клубини тарк этадиган бўлса-да, миллий жамоада унга ҳамон муҳим рол ажратилган.
"Бу мавсумда Горецка "Бавария"да унчалик кўп ўйин амалиётига эга бўлмаяпти, аммо унда жаҳон чемпионатида тахминан саралаш ўйинларидаги каби ролда ўйнаш учун барча имкониятлар бор. У жарима майдончаси ичига ёриб киришни қойиллатади, ҳаводаги курашларда кучли ва жамоага жисмоний қувват бағишлайди. Шимолий Ирландия билан ўйинни эсланг: Горецкасиз биз аниқ ғалаба қозона олмасдик — у боши билан 60 марта тўпни қайтариб юборди. ЖЧ-2026да ҳам биз юқори прессинг қўллаганимизда, рақиб узун узатмалар билан ўйнайдиган вазиятлар бизни кутмоқда", — деди Нагельсманн.
Шу ойнинг охирида Германия терма жамоаси Швейцария ва Гана терма жамоаларига қарши ўртоқлик учрашувларини ўтказади.
