“Башакшеҳир” сафида тўп сураётган ўзбекистонлик футболчилар — Элдор Шомуродов ҳамда Аббосбек Файзуллаев Туркия Суперлигасининг 25-тури доирасида “Гёзтепе”га қарши баҳсда майдонга тушди (2:1). Шомуродов учрашувни тўлиқ ўтказди, Файзуллаев эса 46-дақиқада захирага олинди.

Sofascore портали “Башакшеҳир”нинг биринчи голига ассистентлик қилган Аббосбек Файзуллаевнинг ҳаракатларини 6,8 балл билан баҳолади. Элдор Шомуродовнинг ўйини эса 7,1 баллга лойиқ кўрилди.

Шомуродов ўйин давомида 43 марта тўпга тегинди. У жами 19 та узатма амалга оширган бўлиб, шулардан 14 таси аниқ манзилга етиб борди 74 фоиз). Шунингдек, Элдор “Гёзтепе” дарвозасига 2 марта аниқ зарба йўллади.

Аббосбек Файзуллаев учрашув давомида 23 марта тўп билан муомала қилди. У майдонда бўлган 45 дақиқа ичида 10 та узатма амалга ошириб, уларнинг 9 таси аниқ манзилга етиб борди (90 фоиз). Файзуллаев 4 марта тўп учун курашга киришиб, 3 та ҳолатда ғалаба қозонди. Унга нисбатан икки марта қоида бузилди. Аббос Иван Брнич киритган голга узатмани амалга оширди.

“Башакшеҳир” дарвозабони Муҳаммад Шенгезер ўйиннинг энг яхши футболчиси деб топилди. У жамоасининг ғалабасига муносиб ҳисса қўшди ва 7 та сейвни амалга оширди. Sofascore портали унинг ҳаракатларини 9,4 балл билан баҳолади. “Башакшеҳир”нинг иккинчи голи муаллифи Омар Шаҳиннер эса 7,5 баллга лойиқ кўрилди.

Шу тариқа, “Башакшеҳир” Туркия чемпионатининг 25-турида муҳим уч очкони қўлга киритди. Жамоа ушбу ғалабадан сўнг 42 очко жамғариб, турнир жадвалининг 5-поғонасида бормоқда. Мағлуб бўлган “Гёзтепе” эса 42 очко билан 6-ўринни эгаллаб турибди.