Мадриднинг «Реал» клуби келаси мавсумда Альваро Арбелоанинг ўрнини эгаллаши мумкин бўлган номзодлардан бири сифатида Маурисио Почеттинони кўриб чиқмоқда, деб хабар бермоқда ESPN.
«Мадрид» 12 январда Хаби Алонсо ўрнига Арбелоа тайинланганини эълон қилган эди, бироқ унинг шартнома муддатига аниқлик киритилмаган. Баъзи манбаларнинг таъкидлашича, амалдаги мураббий келаси мавсумда ўз лавозимида қолиши учун унга «мўъжиза» ёки Чемпионлар лигасидаги ғалаба керак бўлади.
ESPN манбаларидан бирининг хабар беришича, «қаймоқранглилар» Арбелоага клубда қолиши учун бошқа лавозим таклиф қилишлари мумкин, жумладан, унга «Реал»нинг захира жамоаси — «Кастилья»даги аввалги мураббийлик ролига қайтиш имконияти берилиши мумкин.
Ҳозирда «қаймоқранглилар» мураббийлик пости учун турли номзодларни кўриб чиқишмоқда. Почеттино — клуб президенти Флорентино Перес юқори баҳолайдиган мутахассислардан бири. АҚШ терма жамоасининг амалдаги мураббийи 2019 йилда «Тоттенхэм»ни Чемпионлар лигаси финалига олиб чиққанидан сўнг ҳам унинг номи «Мадрид»даги иш билан боғланган эди.
Бундан ташқари, бир нечта манбалар ESPN нашрига «қаймоқранглилар» скаутлар бўлими раҳбари Хуни Калафатнинг келажаги ҳам сўроқ остида эканини маълум қилди. Қайд этилишича, мутахассиснинг Перес билан муносабатлари жуда яхши, бироқ янги ўйинчилар учун катта харажатлар қилинганига қарамай, жамоа кетма-кет иккинчи мавсумни совринсиз якунласа, бу «Реал»да қолиш учун етарли бўлмайди.
