Катта Манчестер полицияси «Манчестер Сити» футболчиси Родрига нисбатан текширув бошлади. У яшайдиган турар-жой мажмуасидаги қўшнилари ҳуқуқ-тартибот идораларига мурожаат қилиб, футболчи дронларни деразаларга жуда яқин масофада учираётгани ва шахсий ҳаёт дахлсизлигини бузаётганини даъво қилишмоқда. Бу ҳақда The Sun нашри хабар бермоқда.

Суриштирув ишлари Родрининг ўз пентхауси балконида дрон бошқарув пульти билан тушган фотосуратлари пайдо бўлганидан кейин бошланган.

«Телевизор кўриб ўтирганда деразангиздан бир метр масофада дронни кўришни ҳеч ҳам кутмайсиз», — дея Родрининг қўшниларидан бирининг сўзларини келтиради The Sun.

Полицияга мурожаат қилишдан олдин истиқомат қилувчилар ушбу ҳолатни умумий чатда муҳокама қилишган ва бино консержига шикоят қилишган. Жорий мавсумда Родри «шаҳарликлар» сафида барча турнирларда 24 та ўйинда иштирок этиб, 2 та гол уришга улгурди.