Мадриднинг «Реал» клуби ярим ҳимоячиси Федерико Вальверде «Манчестер Сити»га қарши баҳсда (3:0) Винисиус Жуниорнинг фойдаланилмаган пенальтиси ҳақида гапириб ўтди.

Уругвайлик футболчи биринчи бўлимда хет-трик қайд этган эди, танаффусдан сўнг эса тўртинчи голини уриши мумкин эди. Бироқ у Винисиуснинг ўн бир метрлик жарима тўпини ижро этиш ҳақидаги таклифини рад этди.

«Вини мендан пенальти тепмоқчимисан, деб сўради. У — менинг дўстим, «Реал» афсонаси. У гол ура олмади, лекин бундай ҳолатлар бўлиб туради. Бу футболнинг бир қисми.

Агар Вини пенальтидан унумли фойдаланганида, бу оқшом идеал бўларди. Лекин хато қилиш эҳтимоли ҳар доим мавжуд — бунда сен вазиятга қандай муносабат билдиришинг муҳим. У руҳан тушиб кетмади, мухлислар эса уни қўллаб-қувватлаб туришди», — дея Вальверденинг сўзларини келтиради Madrid Xtra.