Мадриднинг «Атлетико» клуби ёзги трансфер ойнасида Хулиан Альваресни сотишга мажбур бўлиши мумкин. Таниқли инсайдер Гастон Эдулнинг фикрича, «матрасчилар» аргентиналик футболчини олиб қолиш учун деярли имкониятга эга эмас.

Айни дамда ҳужумчи учун иккита жиддий даъвогар бор – «Барселона» ва «ПСЖ». Футболчининг ўз хоҳиши эса шубҳасиз: агар парижликлар молиявий жиҳатдан анча фойдали шартлар таклиф қилса ҳам, у Каталония клубини танлайди.

Transfermarkt баҳосига кўра, Хулиан Алвареснинг нархи 90 миллион еврони ташкил этади. Миш-мишларга кўра, яқинда «Барселона» 26 ёшли футболчи учун 100 миллион евро таклиф қилган, бироқ «Атлетико» бу суммага рози бўлмаган.