«Фенербахче» ўз мухлисларини ранжитди — жума куни жамоа сафарда «Фатих Карагюмрюк»га 0:2 ҳисобида имкониятни бой берди. Шундан сўнг, Доменико Тедесконинг «канарейкалар» бош мураббийи лавозимидан бўшатилиши ҳақида миш-мишлар тарқала бошлади.

«Биз бундай қарор қабул қилганимиз йўқ. Батафсил баёнот кейинроқ берилади», — дея клубдан олинган изоҳни келтиради Fanatik нашри.

Шу билан бирга, манбанинг таъкидлашича, Тедеско муҳим йиғилишга чақирилган. Ушбу учрашув шанба куни, 14 март куни бўлиб ўтади. Эҳтимол, айнан ўша ерда мураббийнинг тақдири ҳал қилиниши мумкин.

Тур якунларига кўра, агар «Галатасарой» ўз ўйинида ғалаба қозонса, иккинчи ўриндаги «Фенербахче» билан ўртадаги фарқни етти очкогача етказиб олиши мумкин.