Италиянинг Милан ва Кортина-д’Ампессо шаҳарлари мезбонлик қилган XIV қишки Паралимпия ўйинлари ўзбекистонлик спортчилар учун омадсиз якунланди.

Пара тоғ чанғиси бўйича эркаклар ўртасида гигант слалом баҳсларида иштирок этган Ўзбекистон терма жамоаси вакили Фирдавс Худоятов илк уринишида 1:32.12 дақиқалик натижа қайд этди.

Кортина-д’Ампессо шаҳридаги “Tofane Alpine Skiing Centre” спорт мажмуасида ўтказилган беллашувларда 21 ёшли спортчи икки бор стартга чиқди.

Иккинчи стартда эса у 1:35.20 дақиқа кўрсаткич билан маррага етиб келди. Ушбу натижалар медаллар учун курашишда етарли бўлмади ва Фирдавс Худоятов мусобақадаги иштирокини якунлади. Шу тариқа ўзбекистонлик спортчиларнинг қишки Паралимпиададаги чиқишлари ўз ниҳоясига етди.

12 март куни аёллар ўртасидаги гигант слалом дастурида Юлдуз Маҳмудова ҳам стартга чиққан эди. У биринчи уринишда 1:46.64 дақиқа натижа қайд этган бўлса, иккинчи стартда 1:47.77 дақиқалик кўрсаткич билан маррага етиб келди. Бироқ ушбу кўрсаткичлар ҳам медал учун курашиш имконини бермади.

Маълумот учун, Ўзбекистон делегацияси ушбу мусобақа учун иккита Паралимпия йўлланмасига эга бўлган эди.

Мусобақа 15 мартга қадар давом этади ва 6 та спорт тури бўйича жами 116 та медаллар жамланмаси ўйналади.

Норасмий медаллар жамғариш рейтингида Хитой ҳисобида 33 та медал мавжуд бўлиб, улардан 12 таси олтин, 9 таси кумуш ва 12 таси бронза ҳисобланади. Иккинчи ўринда АҚШ (9 та олтин, 5 та кумуш, 5 та бронза) ва учинчи поғонада Италия делегацияси қайд этилган (6 та олтин, 7 та кумуш, 1 та бронза)