Italiyaning Milan va Kortina-d’Ampesso shaharlari mezbonlik qilgan XIV qishki Paralimpiya o‘yinlari o‘zbekistonlik sportchilar uchun omadsiz yakunlandi.

Para tog‘ chang‘isi bo‘yicha erkaklar o‘rtasida gigant slalom bahslarida ishtirok etgan O‘zbekiston terma jamoasi vakili Firdavs Xudoyatov ilk urinishida 1:32.12 daqiqalik natija qayd etdi.

Kortina-d’Ampesso shahridagi “Tofane Alpine Skiing Centre” sport majmuasida o‘tkazilgan bellashuvlarda 21 yoshli sportchi ikki bor startga chiqdi.

Ikkinchi startda esa u 1:35.20 daqiqa ko‘rsatkich bilan marraga yetib keldi. Ushbu natijalar medallar uchun kurashishda yetarli bo‘lmadi va Firdavs Xudoyatov musobaqadagi ishtirokini yakunladi. Shu tariqa o‘zbekistonlik sportchilarning qishki Paralimpiadadagi chiqishlari o‘z nihoyasiga yetdi.

12 mart kuni ayollar o‘rtasidagi gigant slalom dasturida Yulduz Mahmudova ham startga chiqqan edi. U birinchi urinishda 1:46.64 daqiqa natija qayd etgan bo‘lsa, ikkinchi startda 1:47.77 daqiqalik ko‘rsatkich bilan marraga yetib keldi. Biroq ushbu ko‘rsatkichlar ham medal uchun kurashish imkonini bermadi.

Ma’lumot uchun, O‘zbekiston delegasiyasi ushbu musobaqa uchun ikkita Paralimpiya yo‘llanmasiga ega bo‘lgan edi.

Musobaqa 15 martga qadar davom etadi va 6 ta sport turi bo‘yicha jami 116 ta medallar jamlanmasi o‘ynaladi.

Norasmiy medallar jamg‘arish reytingida Xitoy hisobida 33 ta medal mavjud bo‘lib, ulardan 12 tasi oltin, 9 tasi kumush va 12 tasi bronza hisoblanadi. Ikkinchi o‘rinda AQSH (9 ta oltin, 5 ta kumush, 5 ta bronza) va uchinchi pog‘onada Italiya delegasiyasi qayd etilgan (6 ta oltin, 7 ta kumush, 1 ta bronza)