«Интер Майами» МЛС мунтазам чемпионати доирасида сафарда «Шарлотт» билан 0:0 ҳисобида дуранг ўйнади.

«Қоплонлар» ҳужумчиси Лионель Месси, шунингдек яримҳимоячи Родриго Де Пауль мазкур учрашув учун қайдномага киритилмади.

Мураббийлар штаби уларга КОНКАКАФ Чемпионлар кубоги 1/8 финалидаги «Нэшвилл»га қарши жавоб учрашуви олдидан дам берди. Бу ўйин чоршанба куни бўлиб ўтади. Жамоалар ўртасидаги илк баҳс 0:0 ҳисобида якунланган.

«Бу — мураббийлар штаби қабул қилиши керак бўлган қарорлардан бири. Сўнгги вақтларда жуда кўп ўйин ўтказяпмиз — чоршанба ва шанба кунлари. Олдимизда эса уйда жуда муҳим ўйин бор. Шунинг учун [бош мураббий] Хавьер Маскерано ва мураббийлар штаби буни энг тўғри қарор деб ҳисоблади. Бу жамоавий қарор эди», — деди ўйиндан кейин «Интер Майами» бош мураббийи ёрдамчиси Хавьер Моралес.

Учрашувнинг сўнгги дақиқаларида Маскерано ҳакамдан иккита сариқ карточка олганидан кейин майдондан четлатилди.

АҚШ. МЛС, 4-тур
«Шарлотт» — «Интер Майами» — 0:0 (0:0)