Ўтган ҳафтада пойтахтимизда 1999 йилда таваллуд топган футболчилар ўртасида анъанавий Владимир Десятчиков хотира турнири бўлиб ўтади.

Турнирда жами 12та жамоа 4та гуруҳга бўлинган ҳолда бош соврин учун кураш олиб боришди. Дилмурод Абдуллаев бошчилигидаги “Бунёдкор” футбол мактабининг 1999 йилда таваллуд топган тарбияланувчилари ўз гуруҳларида “Қўқон-Истиқлол” (8:0) ва БЎСМ-16 (9:0) жамоаларини доғда қолдиришиб, кейинги босқичга биринчи ўрин билан йўлланма олишди. Ярим финалда “Бухоро” жамоаси 4:1 ҳисобида мағлубиятга учратилиб, финал йўлланмаси қўлга киритилди. Ҳал қилувчи баҳсда Муборакнинг “Машъал” тарбияланувчилари билан куч синашилди. Финал учрашувнинг асосий вақтида жангавор дуранг 2:2 ҳисобида қайд этилди. Шундан сўнг ғолиб пенальтилар сериясида аниқланди. Лотореялар баҳсида муборакликлар омадлироқ чиқишиб, 5:4 ҳисобида зафар қучишди. Учинчи ўрин учун кечган баҳсда бухороликлар Тошкентнинг “Пахтакор” тарбияланувчиларини 1:0 ҳисобида енгишиб, бронза медалларига эга чиқишди.

Кумуш медаллар билан 1999 йилда таваллуд топган “Бунёдкор” футбол мактаби тарбияланувчиларини табриклаймиз!

- Финал учрашувининг пенальтилар сериясида омадимиз чопмади. Умуман олганда, шогирдларим кўрсатган ўйиндан қониқдим. Айнан шу мусобақа орқали қўл остимдаги футболчиларда сезиларли ўсишни кузатдим. Бундан аввал Бухоро шаҳридаги мусобақада “Машъал” тарбияланувчиларига асосий вақтнинг ўзида мағлубиятга учраган эдик. Бу сафар ўйинимиз рақибникига қараганда бир мунча яхшироқ бўлди ва асосий вақтда 2:2 ҳисобидаги жангавор дуранг қайд этилди. Ўйлайманки, шундай ишлашда давом этсак, тез орада ўз ёш тоифамизда етакчиликни қўлга оламиз, - дейди жамоа устози Дилмурод Абдуллаев.