“Манчестер Сити” бош мураббийи Пеп Гвардиола “Вест Ҳэм”га қарши кечган ва 1:1 ҳисобидаги дуранг билан якунланган учрашувдан сўнг ўйинни трибунадан кузатиш ҳақидаги фикрлари билан ўртоқлашди.

Мутахассиснинг айтишича, трибунадан туриб ўйинни томоша қилиш унга қийинчилик туғдирмаган. Аксинча, у бундай вазиятни ўзига хос ва қулай тажриба деб баҳолаган.

Гвардиола ҳазил тариқасида келажакда яна трибунага тушиш учун ҳакамлардан кўпроқ шикоят қилиши мумкинлигини ҳам таъкидлади.

“У ерда ўтириш менга ёқди. Балки яна трибунадан ўйинни кўриш учун ҳакамларга кўпроқ эътироз билдирарман. Шунда кўпроқ сариқ карточка олиб, яна у ердан ўйинни томоша қиламан. Кейинги сафар учта ўйинга дисквалификация бўлишим мумкин, шунинг учун яна уриниб кўраман”, деди Гвардиола.

Мураббий трибунада ўйинни кузатиш жараёнида ёрдамчи мураббий Пеп Лийндерс билан фикр алмашиб турганини ҳам айтди. Унинг таъкидлашича, юқоридан туриб ўйинни кўриш айрим вазиятларда тактик ўзгаришлар ва ижодкор футболчиларни майдонга тушириш имкониятларини аниқроқ баҳолашга ёрдам беради.

Маълумот учун, Гвардиола Англия ички мусобақаларида сариқ карточкалар сони меъёридан ошгани сабабли икки ўйинга дисквалификация қилинган. “Вест Ҳэм”га қарши баҳс ушбу дисквалификация доирасида у ўтказиб юборган илк ўйин бўлди. Унинг дисквалификацияси “Арсенал”га қарши кечадиган Англия Лига Кубоги финалига таъсир қилмайди.