«Реал» дарвозабони Тибо Куртуанинг «Атлетико»га қарши дербида иштирок этиши ҳамон сўроқ остида қолмоқда.

Бельгиялик посбон Чемпионлар лигаси 1/8 финалидан ўрин олган «Манчестер Сити»га қарши жавоб ўйинининг (2:1) танаффусида алмаштирилди ва унинг ўрнига Андрий Лунин майдонга тушди. Хабар қилинишича, Куртуанинг сон соҳасидаги мушакларида зўриқиш бор — у ноқулайликни ўйиндан олдинги чигал ёзди машғулотлари вақтидаёқ ҳис қилган.

As нашри берган маълумотга кўра, бугун «Реал» Куртуага дам беришга қарор қилган. Эртага, пайшанба куни дарвозабон жароҳатнинг характери ва даражасини аниқлаш учун тиббий кўрикдан ўтиши режалаштирилган.

Ла Лиганинг 29-туридан ўрин олган «Реал» ва «Атлетико» ўртасидаги учрашув 22 март, якшанба куни «Сантьяго Бернабеу» стадионида бўлиб ўтади.