“Сантос” ҳужумчиси Неймар ўзининг YouTube каналидаги янги сонда футболчилик фаолиятини якунлаш эҳтимоли ҳақида гапирди. Бразилия терма жамоаси устози Карло Анчелотти бўлажак ўртоқлик ўйинлари учун қайдномага киритмаганидан сўнг, футболчи бу борада ўз фикрларини билдириб ўтди.

“Бу менинг охирги Жаҳон чемпионатим бўлади... Ҳатто терма жамоадаги сўнгги йилимми-йўқми, буни ҳам айта олмайман. Фаолиятим поёнига етиб бормоқда, буни тан олишга мажбурман. Яқинларимга доим шуни эслатаман: ‘Имкон борича завқланиб қол, чунки бир кун келиб барчаси тугайди’”, дейди бразилиялик ҳужумчи.

Эслатиб ўтамиз, Бразилия терма жамоаси март ойи охири ва апрель ойи бошида Франция (26 март) ҳамда Хорватия (1 апрель) терма жамоаларига қарши ўртоқлик ўйинларида майдонга тушади. Неймарнинг ушбу баҳслар учун чақирув олмагани унинг фаолияти якунланиши ҳақидаги гап-сўзларни янада кучайтирди.

Бразилия шу йилнинг ёзида АҚШ, Канада ва Мексика мезбонлик қиладиган ЖЧ-2026 турнирида иштирок этади. Қуръа натижаларига кўра, Анчелотти шогирдлари “C” гуруҳидан жой олган бўлиб, гуруҳ босқичида Гаити, Марокаш ва Шотландия терма жамоаларига қарши баҳс олиб боради.

Маълумот учун, 48 та жамоа иштирокидаги навбатдаги Жаҳон чемпионати 11 июндан 19 июлга қадар давом этади. Мусобақанинг амалдаги ғолиби Аргентина терма жамоаси ҳисобланади.