“Santos” hujumchisi Neymar o‘zining YouTube kanalidagi yangi sonda futbolchilik faoliyatini yakunlash ehtimoli haqida gapirdi. Braziliya terma jamoasi ustozi Karlo Anchelotti bo‘lajak o‘rtoqlik o‘yinlari uchun qaydnomaga kiritmaganidan so‘ng, futbolchi bu borada o‘z fikrlarini bildirib o‘tdi.

“Bu mening oxirgi Jahon chempionatim bo‘ladi... Hatto terma jamoadagi so‘nggi yilimmi-yo‘qmi, buni ham ayta olmayman. Faoliyatim poyoniga yetib bormoqda, buni tan olishga majburman. Yaqinlarimga doim shuni eslataman: ‘Imkon boricha zavqlanib qol, chunki bir kun kelib barchasi tugaydi’”, deydi braziliyalik hujumchi.

Eslatib o‘tamiz, Braziliya terma jamoasi mart oyi oxiri va aprel oyi boshida Fransiya (26 mart) hamda Xorvatiya (1 aprel) terma jamoalariga qarshi o‘rtoqlik o‘yinlarida maydonga tushadi. Neymarning ushbu bahslar uchun chaqiruv olmagani uning faoliyati yakunlanishi haqidagi gap-so‘zlarni yanada kuchaytirdi.

Braziliya shu yilning yozida AQSH, Kanada va Meksika mezbonlik qiladigan JCH-2026 turnirida ishtirok etadi. Qur’a natijalariga ko‘ra, Anchelotti shogirdlari “C” guruhidan joy olgan bo‘lib, guruh bosqichida Gaiti, Marokash va Shotlandiya terma jamoalariga qarshi bahs olib boradi.

Ma’lumot uchun, 48 ta jamoa ishtirokidagi navbatdagi Jahon chempionati 11 iyundan 19 iyulga qadar davom etadi. Musobaqaning amaldagi g‘olibi Argentina terma jamoasi hisoblanadi.