Машҳур собиқ футболчи Алан Ширер Лондоннинг «Арсенал» клубининг жорий мавсумдаги барча турнирларда ғалаба қозониш имкониятларини баҳолади.

«Канонирлар» илк совринни шу якшанба куниёқ қўлга киритишлари мумкин — шу куни «Манчестер Сити»га қарши Лига кубоги финали бўлиб ўтади.

«Агар «Арсенал» Лига кубоги финалида ғалаба қозонса, «квадрупл» (тўртта соврин) истиқболи ҳақиқатга айланиши мумкин. Эҳтимол, бу «Сити» учун ҳам бирор соврин ютишнинг сўнгги имконияти бўлар, шу боис бу ҳар икки жамоа учун ўта муҳим ўйиндир. Ҳа, агар Лига кубогини қўлга киритишнинг уддасидан чиқишса, «Арсенал»нинг «квадрупл»и ҳақидаги гап-сўзлар янада кўпайиши аниқ», — дея Ширернинг сўзларини келтирмоқда Arsenal Radar.

Микель Артета ва Хосеп Гвардиола жамоалари ўртасидаги учрашув Тошкент вақти билан соат 21:30 да бошланади.