«Борнмут» бош мураббийи Андони Ираола «Манчестер Юнайтед» амалдаги устози Майкл Кэррик қўл остида ниманинг ҳисобига ўсишга эришгани ҳақида сўзлаб берди.

Инглиз мутахассиси январь ойида истеъфога чиқарилган Рубен Аморимнинг ўрнини эгаллаб, «қизил иблислар»нинг вақтинчалик бошқарувчиси лавозимига тайинланган эди. Мураббийлар алмашинувидан сўнг жамоа тўққизта ўйиндан еттитасида ғалаба қозонди ва Премьер-лига турнир жадвалининг учинчи поғонасида мустаҳкам ўрнашиб олди.

«Шубҳасиз, ҳозирда «МЮ»да ҳаммаси кўнгилдагидек кечмоқда ва гап фақат натижаларда эмас. Кэррик даврида жамоа мудофаада сезиларли даражада ўсди, ҳужумда эса Аморим давридаги юқори даражани сақлаб қолди. Эндиликда улар рақибларга очиқча голли вазиятлар яратишга камдан-кам имкон беришмоқда, ваҳоланки, илгари бу борада муаммолар бор эди», — дея таъкидлади Ираола матбуот анжуманида.

Жума куни Англия чемпионатининг 31-тури доирасида «Борнмут» ўз майдонида «Манчестер Юнайтед»ни қабул қилади.