Каталония гранди «Барселона» яна вақтинча ўз уй стадиони — «Камп Ноу»ни тарк этиши мумкин. Бу ҳақда Diari ARA хабар бермоқда.
Манбага кўра, 2027 йил ёзига мўлжалланган янги том ўрнатиш ишлари кутилгандан узоқроқ давом этади. Илк режага кўра, бу жараён тахминан 4,5 ой ичида якунланиши керак эди, аммо муҳандислар бу муддат 7 ойгача чўзилиши мумкинлигини таъкидламоқда. Шу вақт давомида стадионда ўйинлар ўтказиш имкони бўлмайди.
Клубнинг операцион директори Жоан Сентеллес аввалроқ «Барселона» 2026/27 мавсумининг сўнгги уч турини ва янги чемпионатнинг илк уч учрашувини сафарда ўтказишни режалаштираётганини айтганди.
Агар зарурат туғилса, каталонияликлар вақтинча «Эстади Йохан Круифф»га кўчиб ўтиши ёки яна «Монжуик олимпия стадиони»дан фойдаланиши мумкин. Бироқ иккинчи вариант молиявий жиҳатдан мақбул эмас, биринчи стадион эса Ла Лига талаб қиладиган минимал (15 минг) сиғимга жавоб бермайди.
Клуб президенти Жоан Лапорта «Эстади Йохан Круифф» сиғимини 6 мингдан 16 минггача ошириш вариантини кўриб чиқмоқда. Бироқ бунинг учун шаҳар ҳокимиятидан рухсат олиш талаб этилади.
Қайд этиш жоиз, яқинда янгиланган «Камп Ноу» қисман очилган бўлиб, «Севилья»га қарши ўйинни қарийб 60 минг мухлис кузатди.













