Бразилиянинг «Коринтианс» клубида тўп сураётган нидерландиялик форвард Мемфис Депай можаролар марказида қолди. «Фламенго»га қарши кечган баҳснинг (1:1) иккинчи бўлимида, захирага олинганидан сўнг ўриндиқда ўтирган ҳужумчи уяли телефонидан фаол фойдалангани маълум бўлди.

«Коринтианс» мураббийлар штаби ундан телефонни олиб қўйишни сўрашига тўғри келди. Бу ҳолат стадиондаги мухлислар ва ижтимоий тармоқларда кескин норозиликка сабаб бўлди.

Депай аллақачон юз берган ҳолат юзасидан тушунтириш берди.

«Агар телефондан фойдаланган бўлсам, бу фақат Нидерландиядаги тиббий ходимлар билан боғланиш учун эди. Мен жароҳатим туфайли кийиниш хонасида қолишим мумкин эди, аммо жамоамни қўллаб-қувватлаш учун майдон четига чиқдим. Ўйин натижасидан мен ҳам ҳафсалам пир бўлди. Олдинга ҳаракат қилишда давом этамиз», — деб ёзди футболчи ижтимоий тармоқларда.

Депай 2024 йилдан бери «Коринтианс» шарафини ҳимоя қилиб келмоқда. Жорий мавсумда 32 ёшли футболчи 12 та ўйинда майдонга тушиб, 1 та гол урди ва 1 та голли узатмани амалга оширди. Унинг амалдаги шартномаси шу ёзда ниҳоясига етади.