Braziliyaning «Korintians» klubida to‘p surayotgan niderlandiyalik forvard Memfis Depay mojarolar markazida qoldi. «Flamengo»ga qarshi kechgan bahsning (1:1) ikkinchi bo‘limida, zaxiraga olinganidan so‘ng o‘rindiqda o‘tirgan hujumchi uyali telefonidan faol foydalangani ma’lum bo‘ldi.

«Korintians» murabbiylar shtabi undan telefonni olib qo‘yishni so‘rashiga to‘g‘ri keldi. Bu holat stadiondagi muxlislar va ijtimoiy tarmoqlarda keskin norozilikka sabab bo‘ldi.

Depay allaqachon yuz bergan holat yuzasidan tushuntirish berdi.

«Agar telefondan foydalangan bo‘lsam, bu faqat Niderlandiyadagi tibbiy xodimlar bilan bog‘lanish uchun edi. Men jarohatim tufayli kiyinish xonasida qolishim mumkin edi, ammo jamoamni qo‘llab-quvvatlash uchun maydon chetiga chiqdim. O‘yin natijasidan men ham hafsalam pir bo‘ldi. Oldinga harakat qilishda davom etamiz», — deb yozdi futbolchi ijtimoiy tarmoqlarda.

Depay 2024 yildan beri «Korintians» sharafini himoya qilib kelmoqda. Joriy mavsumda 32 yoshli futbolchi 12 ta o‘yinda maydonga tushib, 1 ta gol urdi va 1 ta golli uzatmani amalga oshirdi. Uning amaldagi shartnomasi shu yozda nihoyasiga yetadi.